Sjandri litli kominn í hús

 Þegar ég kom heim í dag beið mín lítill pakki í póstkassanum. Ég get svo sem ekki sagt að það hafi komið mér á óvart enda átti ég von á honum og ég vissi hvað var í honum. Engu að síður var það mjög spennandi tilfinning að halda á pakkanum og þótt ég væri að verða of seinn í klippingu varð ég að rífa hann upp.

Í pakkanum voru nefnilega þrjú fyrstu eintökin af barnabókinni minni, Sjandri og úfurinn. Bókin fer í dreifingu eftir rúma viku en ég fékk sem sagt fyrstu eintökin send úr prentsmiðjunni í dag.

Það er svolítið merkileg tilfinning að halda á bók sem maður hefur skrifað sjálfur og ég geri ráð fyrir að það sé enn undarlegri tilfinning í fyrsta skipti. Þetta er manns eigið sköpunarverk og það er orðið að einhverju áþreifanlegu. 

Nú er bara að vona að bókinni verði vel tekið.

Athugasemdir

[Sigga Rúna (IP-tala skráð) 7.3.2011 kl. 22:11]

Snilldarframtak hjá þér vinur og ávallt rewording (verðlaunandi) að fá sitt framlag í hendurnar. Þegar hugmynd verður að kjarnföstum veruleika, að sannkölluðu sköpunarverki, þá kætist vitundin :)

Samgleðst,

Kveðja, Sigga "nágranni"

[Guðmundur Sverrir Þór, 9.3.2011 kl. 20:02]

Takk Sigga, það er sannarlega góð tilfinning að fá bókina í hendurnar.