Rétt ákvörðun

Yfirtaka ríkisins á banka er örþrifaráð sem gripið er til þegar ljóst er að ekki er önnur leið til þess að bjarga þeim verðmætum sem þar eru. Ljóst er að bankinn hefði ekki getað staðið við næstu gjalddaga á eftir þeim sem nú var um að ræða. 

Á næstu mánuðum má ætla að Straumur verði bútaður sundur og bestu bútarnir seldir en það sem ekki næst að koma í verð verður lagt niður, þessu má líkja við úreldingu skips. Hinn kosturinn hefði verið að láta bankann í gjaldþrotaskiptameðferð en hætt er við því að töluvert af verðmætunum hefði glatast, einfaldlega þar sem slíkt ferli myndi ganga mun hraðar fyrir sig og menn væntanlega sætta sig við lægri upphæðir fyrir eignir bankans.

Þess vegna verður ákvörðun FME að teljast skynsamleg.

 

Gylfi: Fleira kom til hjá Straumi

Athugasemdir

[Eggert Þór Aðalsteinsson, 9.3.2009 kl. 17:23]

Sæll, ég held að það sé ekki svo stór munur á því hvort ríkið taki yfir Straum eða hann fari í gjaldþrotameðferð. Ríkið hefur hingað til ekki sýnt sérstaka getu til þess að hámarka verðmæti erlendu eigna gömlu bankanna eins og salan á Glitni í Noregi sannar. Eignir Straums eru að stórum hluta til erlendar starfsstöðvar og hlutabréfastöður. Ég efast um að gott verð fáist fyrir þessar eignir. Hvað innlenda hluta Straums varðar þá er væri ráð að endurreisa fjárfestingarbankastarfsemina, enda verður full þörf á slíku sérhæfðu fyrirbæri við þá endurskipulagningu sem bíður okkar í íslensku atvinnulífi á næstu árum.

[Guðmundur Sverrir Þór, 9.3.2009 kl. 18:25]

Sæll félagi!

Munurinn er kannski helst sá að menn geta reynt að standa á bremsunni og bíða aðeins í úreldingarferlinu. Síðan er spurningin um kerfisáhrif gjaldþrotsins. Salan á erlendum eignum bæði Glitnis og Kaupþings fór fram í miklu fáti í haust en nú liggur kannski ekki jafn mikið á.

Erlendar hlutabréfastöður Straums eru ekki líklegar til þess að draga mikið fé inn í búið en ef til vill er hægt að vinna einhver verðmæti úr erlendu starfstöðvunum. 

Hvað fjárfestingarbankastarfsemina varðar þá er ég sammála þér, spurningin er bara hvernig menn vilja fjármagna hana.