Saab á vonarvöl

Sennilega verður fátt til bjargar Saab í kjölfar þess að sænsk stjórnvöld höfnuðu því alfarið að taka í taumana. GM vill selja fyrirtækið ellegar leggja það niður og það eru reyndar fleiri bílmerki sem eiga á hættu að verða tekin úr umferð því bæði Saturn og Hummer hafa verið lögð á skurðarbrettið.

Maud Olofsson, sem er VIÐSKIPTAráðherra, og félagar hennar í ríkisstjórn Svíþjóðar segja GM hafa egnt gildru en að sögn Frederik Reinfeldt, forsætisráðherra, mun það kosta GM að minnsta kosti 8 milljarða sænskra króna að losa sig við Saab og það er kostnaður sem Reinfeldt segist ekki vilja taka á sænska ríkið.

Ég er ekki sannfærður um að þetta sé rétt ákvörðun, í því árferði sem nú ríkir er að mínu mati mikilvægt að hið opinbera styðji rækilega við atvinnulífið. Falli Saab er hætt við því að gífurlega mikil þekking glatist, nema hægt sé að laða annan bílaframleiðanda til Trollhättan. Já, og rúmlega 4 þúsund manns til viðbótar, að minnsta kosti, missa vinnuna en það er auðvitað algjört aukaatriði.

Kannski þau geti gengið í störf lögreglumanna og hjúkrunarkvenna þeirra sem Olofsson var kosin út af.

Viðbót: Ég vil taka fram að ég tel mestu skipta að þessi 4 þúsund störf verði tryggð, t.d. með því að sænska ríkið verði hluti af hópi sem vill kaupa Saab.

Svíar ætla ekki að bjarga Saab

Athugasemdir

[Gulli (IP-tala skráð) 18.2.2009 kl. 23:49]

Saab Automobiles er dauðadæmt fyrirtæki - sænska ríkið á andskotann ekki að fara að moka meiri peningum í þá botnlausu hýt. Það er örugglega mun ódýrara fyrir Svía að einfaldlega borga þessu fólki fyrir að telja trén í kringum Gautaborg en að halda þessu gangandi líki á hreyfingu lengur. Ríkið er þegar búið að henda fleiri milljörðum inn í Saab og það hefur nákvæmlega engu máli skipt - fyrirtæki sem framleiða vöru sem fólk vill ekki kaupa verður að fá að fara á höfuðið þó það sé kreppa. Peningunum væri miklu betur varið í ný fyrirtæki eða að styrkja fyrirtæki sem hafa amk lífsvon.

[Guðmundur Sverrir Þór, 19.2.2009 kl. 00:09]

Aðalatriðið er að störfunum sé bjargað.

Á meðan Saab er í eigu GM mun engu máli skipta hvað ríkið lætur Saab fá mikla peninga, þeir fara beint til Detroit og það sama á við um Volvo PV og Ford. En ég er ekki sammála um að varan sé dauðadæmd, hana má alltaf þróa og miða við nýja markhópa.

[Gummi (IP-tala skráð) 19.2.2009 kl. 07:44]

Þetta er nú spurning um hvar á að draga línuna, þe. hvaða störfum á að bjarga. Mörg önnur fyrirtæki eru illa stödd, já eða að spara til þess að ýta undir hlutabréfin, sbr. Ericsson.

Svo er þetta líka spurning hvort að ekki væri arðbærara fyrir ríkið að nota þennan starfskraft í eitthvað annað, þe. bjarga störfum en láta SAAB fjúka.

[Guðmundur Sverrir Þór, 19.2.2009 kl. 07:53]

Mér er sama hvernig menn fara að því, bara að störfunum sé bjargað. Í þessu árferði á að bjarga öllum þeim störfum sem mögulegt er, menn verða að gera sér grein fyrir því að þetta er ekki einhver venjuleg niðursveifla sem snýr við í haust. Heimurinn er á barmi kreppu af því tagi sem ríkti á 4. áratugnum og því fyrr sem sem átta sig á því og byrja að bregðast við, því betra.

Það á alls ekki að láta GM hafa peningana og ríkið á ekki að vera að vesenast á hlutabréfamarkaði. 

[Egill (IP-tala skráð) 19.2.2009 kl. 11:55]

Ég er sammála þér Guðmundur að heimurinn stendur frammi fyrir sambærilegri kreppu og ríkti á 4. áratugnum. En það er eingöngu vegna þess að stjórnvöld, alls staðar, eru að bregðast við á sama hátt og gert var á sínum tíma. Stöðug inngrip gera einungis illt verra. Það varð álíka niðursveifla á fjármálamörkuðum í USA árin 1920-'22. Stjórnvöld þá gerðu hins vegar ekki neitt og því hreinsaði markaðurinn sig sjálfur á ca. tveimur árum og fyrir vikið hefur þessi staðreynd ekki ratað í sögubækurnar. Nú hrópa menn líka húrra fyrir Obama fyrir að blæða 75 milljörðum dala í húseigendur. Ef fólk nennir að skoða staðreyndirnar þá sést að þetta er bara grín. Þetta er sambærilegt og ef íslenska ríkið myndi henda 8,5 milljörðum króna í íslenska húseigendur sem skulda 2.000 milljarða! Það er bara verið að plástra og plástra vonlausa stöðu í stað þess að leyfa öllu sem illa er statt að gossa svo hægt sé að byrja uppbyggingu.

[Guðmundur Sverrir Þór, 19.2.2009 kl. 20:10]

Já, ég deili því miður ekki þessari ofurtrú þinni á markaðinn Egill. Við verðum bara að vera sammála um að vera ósammála um það.

Hvað varðar lægðina árið 1920 þá man ég eftir að hafa lesið um hana í hagsögunni en ætla svo sem ekki að þykjast vera neinn sérfræðingur í málinu. Hins vegar getur verið töluverður munur á niðursveiflum. Vandamálið nú er fyrst og fremst það að  ekkert traust ríkir á mörkuðum. Þannig var því t.d. ekki farið þegar netbólan sprakk. Eins og ég segi veit ég hins vegar of lítið um lægðina í byrjun 3. áratugarins til þess að fara að rökræða hana. Gæti vel verið að um eðlilega leiðréttingu hafi verið að ræða en hver veit. Mér þykir hins vegar mjög ólíklegt að hún hafi ekki komist í hagfræðibækurnar vegna þess að ekki var aðhafst. Þær kennslubækur sem ég hef haft eru sjaldan skrifaðar af öðrum en frjálslyndum hagfræðingum.

[Egill (IP-tala skráð) 20.2.2009 kl. 09:49]

Ef þú byggir mat þitt á getu frjáls markaðar til að sjá um sig sjálfan á umhverfinu eins og það er að mestu leyti í dag, getur niðurstaðan aldrei verið önnur en sú að frjáls markaður virkar ekki. Það er vegna þess að inngrip og afskiptasemi stjórnvalda af markaðinum er of mikil og víðtæk. Markaðurinn hefur í raun sjaldan fengið að ráða sér sjálfur. Hins vegar eru afmarkaðir hlutar markaðarins lausir við afskiptasemi og þar er hagur neytenda mun meiri en annarsstaðar. Má þar nefna tölvuframleiðslu þar sem neytendur búa við það að varan verður sífellt fullkomnari og um leið ódýrari. Ég fæ ekki séð rökin fyrir því að treysta frekar dómgreind tiltölulega fámenns hóps stjórnmálamanna til þess að lagfæra slæmt ástand heldur en "collective" dómgreind markaðarins þar sem þátttakendur eru það fjölmennir að rétt niðurstaða hlýtur að fást um bestu lausn.

[Guðmundur Sverrir Þór, 20.2.2009 kl. 10:44]

Alla jafna getur markaðurinn rétt sig af sjálfur en það er til viss tegund af niðursveiflum sem markaðurinn getur ekki lagað. Það myndast neikvæður spírall sem ekki er hægt að stoppa nema með inngripi. Traustið er ekki til staðar.